Sehenswürdigkeiten

Grand Théâtre in Bordeaux

zGrand Théâtre khört zu da wichtigsta kulturella Ushängeschilder vu dr Stadt Bordeaux. Es isch 1773 bis 1780 noch da Entwürf vum Architekt Victor Louis erbaut und am 7. April 1780 mitem Drama "Athalie" vum Jean Racines igweiht worda. Dia neoklassizistischi Fassada verfüagt über a Sülavorbau us 12 riesiga korinthischa Süla mit Architraca. Uf dena Statuena vur anika Mythologie stönd 9 Musa und 3 Göttina, dVenus, dJuno und dMinerva. Das Ensemble erinnert an a griachischa Tempel. 

Ds Innara vum Grand Théâtre isch in da Johr 1990 und 1991 ufwendig restauriart und in da Originalzuastand in da Farba blau und gold brocht worda. Im Theater finden regelmässig Uffüahriga vu Theater, Oper, Ballett, wia au Konzert statt. Ds Grand Théâtre chan aber au im Rahma vunnera Füahrig bsuacht werda.

Pont de Pierre

dPont de Pierre in Bordeaux isch eines vo da ganz romantischa Stella in Bordeaux. Bsunders in dr Nacht, wenn dia alta Lampa igstellt sind, wo dia alti Steibrugg wunderschön belüchten. Dia Brugg isch 1810 vum Napoleon in Auftrag ge worda und het dia ersti Brugg sölla si, wo über dGaronne füahrt (Fluss durch Bordeaux). Dr Bau vu dera Brugg het allerdings zwölf Johr duret. DBrugg het 17 Böga, und bis hüt isch ma dr Meinig dass das so isch, will am Napoleon sind Nama insgesamt 17 Buachstaba het. Über dia Brugg chama au nüt no zweispurig drüber fahra und dMittelspur wird brucht vu da Trämm vo Bordeaux.

Place du Parlement

Inmitta vur Altstadt und sinna viela Strossa befindet sich dr Platz "du Parlement". De klii rechteckig Platz stammt us dr ersta Hälfti vum 18. Johrhundert und isch lang als Marktplatz gnutzt worda. Durch sini gschlossni Bebauuig und am Brunna in dr Mitti isch de Platz bsunders stimmigsvoll. Er isch hüt an Teil vur Fuassgängerzona und isch voll mit chlina Pub, Bars und Restauräntli. Am Obig ischer, natürlich wia alles in Bordeaux, wunderschön usglüchtet.

An dr Schaufront vu Bordeaux, am Ufer vu dr Garonne, findet ma sicherlich dr schönsti Teil, dia alti Hafabörsa. Das prachtvolla Gebäude, wo am ehemaliga königlicha Platz vom König Louis XV stoot, isch im 18. Johrhundert (1729 - 1777) vom Stadtchef Claude Bouchet undem Architekt Jacques Gabriel erbaut worda. Fortgsetzt und abgschlossa isch dia Arbeit aber vum Marquis de Tourny und am Sohn vum Architekt Jacques-Ange. Dr Brunna vu da drei Grazia in dr Mitti vum Platz isch im Johr 1864 drzua cho.

Gegaüber vur alta Börsa, vo hüt zZollmuseum drin isch, am Ufer vur Garonna, befindet sich dr Miroir d'eau. A 2cm tüfi Wasseroberflächi, in dera sich dBörsa spiaglet (das xeht ma wunderbar ufm Bild). Am Tag isch das vorallem an beliabta Platz vu Kinder und am Obig treffend sich döt vieli Studenta.

Cinéma Utopia Bordeaux

Dr absoluti PalpitaTravel Tipp isch zKino Utopia ir Altstadt vu Bordeaux. Das Kino isch igrichtet innera alta Kircha und het füf Kinosääl. dQualität vum Kino isch genial, also i hätti nia im Leba drmit grechnet. Dr einzig Nochteil für vernarrti Kinogänger isch halt leider, dasses kai Hollywood Komerzstreifa abspielend. As sind vorallem so klinneri, ab biz unbekannteri Produktiona, wo zum Bispiel ar Berlinala oder a da Filmfestspiel vu Cannes oder Locarno vorgstellt worda sind. Aber zgeniala isch, dass dia ersti Vorfüahrig am Tag nur 4 Euro und dia wiitera 6 Euro kostet. zJohresabi kasch sogar für nur 45 Euro kaufa!

Und eba, zAmbiente findi das wo vorallem iladet. Ma sitzt im Prinzip wia in der Kircha, xeht, dia alta groosa Kirchafenster, sitzt aber zur glicha Ziit ufemna bequema Kinosessel!

Saint-Émillion

Ds Wiiabaugebiat Saint-Émillion liggt ca. 40km östlich vu Bordeaux. As isch wunderschön zum aluga und isch a riesa grossi Touristaattraktion, dos halt eis vu da bekanntista Wiiabaugebiat vur Welt isch. Das kliina Örtli Saint-Émillion isch sehr alt und verträumt. As liggt ufemna Hügel, umgeba vomena Merr vu Wiireba und khört, wia Bordeaux selber au, zum Weltkulturerb vur UNESCO. Hauptsächlich wird döt dRebsorta Merlot abaut, abr au Carbernet Franc, Cabernet Sauvignon (mmmmmh) und Malbec.

Vum Ambiente her chamas ir Schwiiz verglicha wia Bellinzona, mit da viela kliina Gässli und am Gschmack vu da alta Stadt Muura. Natürlich isch Saint-Émillion total uf da Tourismus usgrichtet und as het eifach Restaurant, neba Souvenir-Lada, neba Wii-Lada, neba Kääslada, neba Bluama-Lada....

Zentrum Bordeaux

nomol zur Erinnerig: dia Sehenswürdigkeita wonner jetzt do xeh hend, sind nur an Bruchteil vu dem, was ma in Bordeaux alles xeh chan. I han zum Bispiel no kei einzigi Kircha erwähnt, no kai Musea erwähnt... as git no so viel me zentdecka in Bordeaux, wills eifach wia xait, as einzigs Museum isch!