Cap Ferret

Hallo dahai, hallo PalpitaBsuacher!

Hüt bini zerst Mol in minem Leba amena Kap xi! Okeoke, as isch nid grad zKap der guten Hoffung xi oder so, aber immerhin isches vur Landschaft her total idrücklich xi! I meina, ma fahrt us Bordeaux usa, fahrt ca. 60km und denn plötzlich ischma innara total andera Landschaft, wo eher Saudi Arabia als Frankriich glicht. Nanai so krass isches denn scho nid xi, aber wiama schu nur uf dem Bild xeh chan, isches eifach gewaltig döta, will dLandschaft döta eifach vu riiiiesiga Sanddüna prägt isch. Am üssersta Zipfel vu dem Kap hets au no a Lüchtturm kha, de hemmer natürlich auno müassa bestiega. Exakt 53m hoch und 247 Stegatritt sinds xi, bis miar a atemberaubendi Ussicht über de wunderschön Egga vu Frankrich hend chöna gnüssa. 

Aber zbesta am hütiga Tag isch eifach zWetter xi. As isch fast nid zglauba, miar hend hüt echt dr ganz Tag xtra biz umagluagt wiaviel Wolka dass mr xehnd. Miar hend genau eiiiiimol a kliini Schleierwolka überem Strand chöna entdecka, und das isches xi. Das hani also au nonia erlebt. Wianner chönd lesa isch hüt dr Tag der ersten Male. Vilicht hani hüt no as anders ersts Mol :D also nid so wianner jetzt denkend xD nanai, das wo iar meinend chunt natürlich erst weni ghürota han... Nai n'importe quoi... vilicht gohni hüt no in Usgang do, mal guggn wia mini kleeene zwäg isch.

Machends guat, und hüt het denn no mini Mam Geburtstag für alli wo nonid gratuliart hend (wia i zum Bispiel... :O )

a bientôt...

Grand Cloche

Hallo Bsuacher-inna und -ussa ... :D

jaaau hüt hetendr mi und Verena sölla xeh, isch eifach zu lustig xi. Wia dia grössta Touris vur Welt simmer usgrüstet mit Sunnabrilla und Kamera durch Bordeaux gschuanet. Eigentlich hemmer jo vor kha, nomol ins Kino zgo, jedoch simmer 5min zspoht xi, und will dia oberalternativa, sehr kulturella Franzosa niamert me ina lönd, wenn ma 5min spoht isch, hemmers halt chöna vergessa mit Cinéma aujourd'hui. Egal miar sind denn in dStadt. Eifach alli Sehenswürdigkeita wo in dera Stadt stönd hend sich voremna Kameraschuss vu miar müassa in acht ne :D denn simmer irgendwia no imana Immigranta Viartel glandet, wommer so feini türkischi Spezialitäta gessa hend, wäää, kotzgruuusig xi, oke dVerena hets gliabt.... :S

leider gohts ihra au hüt nonid viel besser, und darum lömmer das mitem Nachtleba hüt wohrschinlich nomol us. Jonu, mora isch au nomol an Tag, und denn gömmer uf alli Fäll ans MEER !! Juhuuu :D

bis morgeeeeen...

Saint-Émillion

Bonjour mes amours :D

Hüt bini mit minem immerno kranka Schatzeli zSaint-Émillion. Wianer usem Teil Sehenswürdigkeita entneh chönd, isch Saint-Émillion eis vu da weltbekanntista Wiiabaugebiat. As wunderschöns, alts Städtli, ca. 40km östlich vu Bordeaux. Jo jetzt wia simmer döt hera cho: dGastmuatter Sybille het üs eifach gfrogt ob miar ihres Auto wend ne. As heigi eifach fast kai Most me drin, ma müassis denn halt go tanka.

Jo bravo, das Auto het würklich fast kai Most me kha und miar hend zmitzt im Eibahnstroos-Stau zimli schiss kriagt, dass mr plötzlich stoh bliebend. Zum Glück hemmer denn no mitem letsta Tröpfli Benzin im Tank a Tankstell gfunda und sind nach Saint-Émillion gfahra. Wow as isch echt wunderschön xi!

Will mis Schatzeli eba immerno chrank isch, hemmer nomol an ruhiga Obig im Gasthuus gschoba und hend üs am Mittermeyer sini Safari aglost. Mora Obig, falls dVerena wieder gsund isch, gömmer denn no zNachtleba vu Bordeaux go inspiziara.

a bientôt...

Looking for Eric - im Utopia zBordeaux

Hey Schwiiiz :)

also hüt isch wieder total lustig xi, haha ma chans echt fast nid verzella. Also zersta wasmr hüt lustigs passiart isch, isch folgendes: i bin hüt ir Chuchi mit täglich Espresso mit Président Weichkäs am inaziah xi, do isch mini Gastmuatter ganz entsetzt zu miar cho! "Du muasch miar unbedingt chu helfa!" Si heigi hüt usagfunda, dass öper uf ihrem Computer ufera Pornosiita xi sig, und jetzt weli si usafinda, wenn und vorallem wer das xi sig:) Jo do i jo Informatiker bin und eifach alles über PCs wüssa muass - hmmm - bini a Stund mit ihra am Computer gsessa und han mol biz recherchiart. Und was isch usa cho? Irgendwer het so zimli alli Schwula Pornosiita und Tiarpornosiitana vum Internet durchforscht, und dass zletsta Mol gestr xD Jo miar isches au langsam peinlich worda wo si nüma gwüsst het was drzua sega. I han mi denn eifach mol usm Staub gmacht.

Do mis Schatzali leider chrank isch, hani mit ihra abgmacht, dasi hüt allai mol in dStadt gohn. I han mitera Kollegin abgmacht, dassmr hüt zema ins Kino sind. Also simmer zema ins Utopia, somena geila alta Kino wo sich innara alta Kircha befindet :D het aber sogar no meh Kinosääl als Chur und kostet sogar nur 4 Euro pro Vorstellig! Miar sind go Looking for Eric go luaga! De isch echt klasse xi. An Ma, eba dr Eric isch wegm ganza Stress wonner het, langsam aber sicher total Schizo und erstrecht wenner eis kifft, und lernt drbi dr unechti Eric Cantona kenna, an ehemaliga Superstar vu Manchester United. Mit sinna Tipps bringt er ihn denn schliasslich wieder uf da richtig weg und sis Leba wird denn zum Schluss wieder super... Nochdem super Film simmer denn no, wia sichs khört, as feins Gläsli Médoc go trinka. Und jetzt sitzti im Zimmer, losa biz Musig, pflega min Schatz, und lohn dr Tag mit ihra no biz usklinga.....

a bientôt...