Sehenswürdigkeiten

La Soufrière

La Soufrière isch an aktiva Vulkan, wo sich uf dr Basse Terre siita befindet. Ma chan bis ca. 300m unterem Vulkankrater parkiara und nocher ufa laufa. Ma het ca. 2 Std. und as isch xtrem aspruchsvoll für a Wandertour. Ma muass also rechti Wanderschuah oder wenigstens Turnschuah aha. Für Kinder isch das übrigens gar nüt. PalpitaTravel Tipp: Ma sött früah am Morga go, und das nur bi klarer Sicht. Denn het ma nämlich dMöglichkeit, a Ussicht über ganz Guadeloupe chöna gnüssa, wills nämlich mit 1476 m.ü.M zuglich auch dr höchsti Punkt vu dr Insla isch.

Les Saintes vu dr Vogelperspektiva

Wunderschön und eifach ein MUSS wenn ma in Guadeloupe isch, isch dr Bsuach uf da Nebainslana. Ganz liacht zerreicha mit Schiff sind dia Nebainslana La Desirade, Marie-Galante und Les Saintes. Guadeloupe het zwar no 3 wiiteri Inslana wo drzua khörend, 2 drvo sind aber sehr wiit aweg, und praktisch nur mitem Flugzüüg zerreicha und dia ander, zu dera gits nocher no me.

La Desirade isch eigentlich ziemlich unspektakulär, will sie vu dr Natur her zimli glich isch wia dHauptinsla Grand-Terre. As git aber a Kapella woma zFuass in 20min chan erreicha, und vu döt us het ma a wuunderschöni Ussicht.

Marie-Galante findi schu viel interessanter, do si noch da beida Hauptinslana dia grössti Insla vu Guadeloupe isch. Am besta isch, ma miatet isch an Roller, und entdeckt dia viela Sehenswürdigkeita vu Marie-Galante selber. As het wunderschöni Klippana im Süda!

Min absoluti Favorit sind aber dLes Saintes. Das sind zwei ganz ganz kliini Inslana, wo eba zema dLes Saintes ergebend. DStimmig uf dera Insla isch sehr familiär, und as kennt jeda eifach jeda. PalpitaTravel Tipp: Am besta isch, ma organisiart sich döt a günstigi Unterkunft, und bliebt grad min. 2 Täg, damit ma de familiäri Flair vur Insla kennalernt. Natürlich isches au do wieder vu Vorteil wenn ma an Roller het, damit ma biz mobil isch, dia gits für 15 Euro zmiata.

Petit Terre - kliises Paradies

Petit-Terre - Vu miar us, dia schönsti Sehenswürdigkeit vu Guadeloupe! Petit Terre isch a munzigi unbewohnti Insla, wo us zwei Inselpaar bestoht. Dr linki Teil vum Inselpaar döff vu Menscha gar nid betretta werda, do das as Naturreservoir isch, und dHeimat vu über 9000 Leguana. Dr rechti Teil het an kliina Strand und au ganz viel Leguana wo döt wohnend, jedoch darf ma de Teil vur Insla betretta. Do zMeeresterritorium vu Petit-Terre au Naturreservoir isch, und zFischa i dem Gebiat strengstens verbota isch, chama döt uuunglaublichi Tiar xeh bimana Schnorchel-Tauch-Gang. Ma xeht riiiiiesigi Schildkröta, Riffhai, Baracudas und unzähligi Fisch in allna Farba wos git. Und zHighlight chund erst no: wenn ma mitamna Boot abiz usafahrt und ma biz döt verwielt, chan ma ufs Mol dutzendi Delfin xeh und mit dena spiela und schwimma. As atemberaubends Gfühl! Für mi isch dia Insla eifach zParadies, wiama sich das in da Träum vorstellt!

Kajakfahra in da Mangrova

Kajakfahra in da Mangrova isch as riesa Abentür. Ma isch mitta zwüscha Strüchel und Gebüsch, wo irgendwia usem Meer wachsend, und as isch a unheimlich ruhigi Stimmig. Ma khört nur Schnattera vu da Vögel, oder zKnischtara in da Strücher, und ab und zua gseht ma an flügenda Fisch, wianner schwungvoll über dWasseroberflächi springt. Astrengend isches! Lut agaba vum Guide hemmer ca. 14km mitem Kajak zrugg gleit, also an guata Tagesusflug inkl. Mittagessa. Jedoch würdi empfehla, dia Tour nid ab Saint-Rose zmacha. Will dia Tour wär wunderschön, jedoch sind dia 14km eifach zviel! Aber das Abentür lohnt sich uf alli Fäll.

Taucha mit CIP

Jetzt chömemer zu mim persönlicha sportlicha Highlight vu Guadeloupe, vorallem willis halt in Guadeloupe au zersta Mol gmacht han: zum Taucha. In Malendure, das isch direkt bi Bouillante, ar Westküsta vu Base-Terre, chan ma wunderschön go taucha, bi dr Insla Pigeon. Für grad amol 25 Euro chan ma go taucha, inkl. Taucherazug, Instruktion, begleitem eistündigem Tauchgang und Planteur. Wenn ma wiiteri Mol goht kriagt ma sogar no einzelni Tauchlektiona drzua, sprich wiama unter Wasser dTaucherbrilla entwässeret und so Sacha. As het döt as wunderschöns Riff woma Fisch in allna Farbana xeht. Ohni Tauchbeschienigung taucht ma uf ca. 7m, was aber total usreichend isch. Mit bizli Glück xeht ma sogar Schildkröta!

Seilpark im Zoo de Marmelles

Jetzt amol au no öpis, woma problemlos mit Kinder chan macha, dr Tappeur. Das isch an riiiesiga Hochseilpark, im Herza vum tropischa Wald. Riesigi Bäum wartend nur druf, dass ma uf dena umakläteret. Was natürlich au ganz interessant isch, dasses unter dem Hochseilpark au grad no dr Nationalzoo het. zUshängeschild vu dem Zoo sind dia ganz viela Waschbära wos hend, aber natürlich hends au sus no ganz vieli Tiar, wia Affa, Fischotter, Papageia und wases sus no alles für Tiar uf Guadeloupe git. Wers aber liaber biz Actionriich het, goht uf dia anderi Stroosasiita in da richtigi Tappeur. Dr letsti Teil vu dem Hochseilpark isch nämlich nüma für Kinder und schwachi Menscha denkt. Nochera ersta Teststrecki gohts ufa Abentürstrecki woma ca. a Stund drfür het und nocher total uspoweret isch!

La Caravelle

La Caravelle isch dr Strand in St. Anne und khört us minnara Sicht zu da aller schönsta Stränd woma sich chan vorstella, wia imana Reisekatalog vur Karibik. Wiisa Strand, durchsichtigs Meer, riiisigi Palma und mega feini Frücht woma sich direkt am Strand kaufa khan. Das ganza würkt a biz touristisch, jedoch liggt das dra, dass das dr Hotelstrand vum Club Méd Hotel isch.

Surfa in Guadeloupe

Natürlich chan ma in Guadeloupe no viel me erleba, will dia Insla vor Natur so vielfältig isch. Canyoning, Surfa, Kyt Surfa, Segla, Katamaranfahra, Fischa, Wassertöfffahra... Dr Spassfaktor und dMöglichkeita wiama zu dem kunt sind fast unbegrenzt. 

Was aber sehr wichtig isch zwüssa, PalpitaTravel Info: In Guadeloupe gits leider nid viel touristischi Intitutiona. Dia meista Sacha muass ma selber organisiara usser ma findet grad per Zuafall eina wo das alles macht. In St. Anne gits z.B. direkt am Strand nebem Americano dr Lee, wo ganz wunderschöni Toura zemastellt, organisiart und so abütet.