Tagebuch
So liebe PalpitaMoments Besucher, ihr befindet euch jetzt in meinem Tagebuch zu meine Tripp ins Paradies. Da das Tagebuch etwas ziemlich persönliches sein sollte, verfasse ich grundsätzlich alle Berichte meiner Erlebnisse auf schweizer-deutsch. Ich wünsche euch viel Spass beim lesen und würde mich sehr über Kommentare freuen!
Di
19
Mai
2009
la dernière semaine :(
Tauchen in Malendure
Sehr geehrtes Zielpublikum :) ,
i han jetzt zletsta Wuchaend verbrocht, und as isch eifach unglaublichs schlechts Wetter xi, aber wer stört Rega schu, han mi jo schu biz dra gwöhnt... Miar sind aber go taucha, und döt spielt jo bekanntlich zWetter kai Rolla... I han min letsti Tauchgang echt gnossa, und han nomol echt chöna profitiara. Wili xait han, dases min letsti Tauchgang isch, hani a ganzi Stund chöna go, und as isch eifach genial xi. Vielicht usm Grund, dases gregnet het, sind mega viel Fisch uma xi... As het unzähligi Schwärm kha, woma eifach het chöna dri schwimma, as bomba Gfühl! Leider hemmer aber dasmol kai Schildkröta gfunda...
Jo und jetzt het jo au scho mini letsti Wucha agfanga, und mim Wetter hani glaub no unglaublichs Glück. Gester und hüt isch nämlich echt super xi, und dWettervorhersag bis zum Wuchaend chöntend nid besser si! Jo mis Restprogramm xeht jetzt no so us: morn gohni am Morga no in dSchual und macha dAbschlussprüafig, woni den ins Niveau iteilt werda, am Donnstig gömmer an Schualusflug go macha, will jo schowieder an Fiirtag isch (vo dena gits do eba unzähligi, sprich jedi Wucha mind. eina...) und am Fritig hani nomol normal Schual am Morga und kriaga den dResultat vur Prüafig. Und zu guter letzt am Samstig gohni am Morga am 10i go zTattoo macha und am Obig am 5i Flügi jo schu wieder hai.
Highlights vu der Wucha werdend sicher mol dr Schualusflug, sona Hochseilpark im tropischa Wald, denn "das letzte Abendmahl" in minem liablings Restaurant "zLuculus" und denn natürlich zTattoo macha, woni natürlich no überhaupt kai Schiss drvo han:)
Für alli wos nonid mitübercho hend, i gohn denn übrigens definitiv a Wucha noch minem Itreffa in dr Schwiiz wieder nach Frankriich, aber das Mol nach Bordeaux, und zwar nur für a Wucha, zu minem Schatzilein...
Also Schwiiz, ma xeht sich bald... Freu mi schu biz uf eu :) a biz, würkli nur a biz :)
eura Mill
Di
12
Mai
2009
Übelkeit, Heiterkeit, Schnelligkeit
Strand in Grand-Bourg
Bonjour liabi Palpita-Bsuacher,
i hoffa iar sind fit und bereit für a neui Story usm Leba vomena Reisenda im Paradies? Also, dWucha 10 isch bereits fertig, und i han wieder as genials, sogar verlängerets, Wuchaend erlebt. Am Fritig sind i, dr Remy und dr Michel in Marie Galante xi, dass ich dia grösti Insla neb dr Hauptinsla. Döt hemmer üs Roller gmiatet, und sind dr ganz Tag einfach umablocht, insgesamt hemmer über 100km zrugg gleit. Do miar a super Tourista Landkarta drbi kha hend, hemmer au super Sehenswürdigkeita xeh, zum Bispiel zArsch vur Welt. Das isch eifach sona riiiiiiiiiiiesa Loch im Boda, ar Küsta, südlich vu Marie Galante. Denn hets no super Ussichtsklippana kha und eifach dia schönsta Stränd woni je xeh han.
Aber jetzt frogend iar eu sicher, wieso dases im Titel Übelkeit, Heiterkeit und Schnelligkeit heisst. Also, Schnelligkeit, will dia klina Roller fast hundert druf kha hend, Heiterkeit, wills eifach immer lustig isch mit dena Typa, und Übelkeit.. eba das isch zProblem xi: Zum uf Marie Galante zcho, muama jo logischerwies zBoot ne. Und das Meer isch halt nid grad dr Heidsee... Und jetzt isch eifach zProblem xi, dass vu ca. 50 Lüüt an Bord, ca. 40 kotzt hend. Miar drei hend üs chöna zrugg heba, resp. i und dr Remy hend überhaupt kei Problem kha, obwohl mit dr Ziit biz nach Kotze gstunka het!
Jo und am Samstig hani nid viel gmacht, miar sind uf St-François biz go lädala, aber isch eba zimli schlecht Wetter xi.
Aber am Sunntig bini mir Livia und dr Christa uf da Vulkan, wo zuglich au dr höchsti Punkt uf dr Insla isch. Ja aber de Vulkan hets in sich kha! Sind zwar nur 300 Höhameter woma innert 1.5 bis 2 Stund zruggleit, aber dass ma döt ohni Chläterusrüstig ufachan isch as Wunder. Nai echt, as isch kriminell xi zum döt ufa cho, aber miar hends alli unverletzt gschafft! aber miar sind leider nid mitera guata Ussicht belohnt worda, nur mitem gstand vu Schwäfel, und dr chälti vum Näbel und da Wolka, wia au mitem Wind vo eim zittrig gmacht het. Aber chum simmer vum Gipfel abagstiega, hend sich dia scheiss Wolka verzoga, und miar hend wenigstens vu una chöna wunderschöni Picts macha! Duna wieder acho, simmer wenigstens no mitemna Bad innara heissa Quella belohnt worda :), und mitemna herzhafta Essa im McDonals in Basse-Terre, dr Haupt"stadt" vu Guadeloupe.
Jo, c'est ça, das isch mis Wuchaend xi, wieder xtrem viel erlebt. As tuat miar übrigens mega leid dasi kai Fotis me ufaglada han, aber as goht im Moment so xtrem lang zum Fotis uf dHomepage lada, darum hani mol temporär alli Picts nur uf Facebook, döt gohts eba huara schnell. Aber as chömend denn schu wieder Picts uf dPage. Danka für zVerständnis, und bis bald, bin jo in zwei Wucha schu wieder dahai.
Eura Mill
So
03
Mai
2009
dia doofa Mangrova ...
Mangroven - nord. Base-Terre
Sehr geschätzti Palpitamoments Bsuacherinna und ussa...,
dr Titel "dia doofa Mangrova" isch a bizli schlecht gwählt. Wieso, erkläri jetzt...
Also miar sind am Fritig, isch jo verlängerets Wuchaend xi, zu da Mangrova go Kajak fahra. dMangrova isch sonas Gebiat, nördlich in Guadeloupe, zwüscha Grande-Terre und Base-Terre. Und das isch as Gebiat mitera speziella Vegetation, und as gseht us wiana Mischig zwüscha Meer, See, Wald, und Sumpfgebiat. Also, as isch im Meer, isch still wiana See, isch umgeba und umzinglet vo riesiga Waldlandschafta, und isch mitta im Sumpfgebiat, und drzwüscha hets überall wieder so kliini unbewohnti Paradiesinsla mit wiesem Sand und Palma... Darum isches jo eigentlich vom Gebiat her mega interessant und schön, aaaaaber...
Miar sind ca. 15km uma paddlet, 15 KILOMETER, anderi hend scho zFuass Problem bi dera Distanz. Aber zum Mittagessa simmer eba uf sona kliini unbewohnti Insla, und das isch echt top xi, mega schön. Zum Schluss simmer, wiama ufem Fötali guat xeht, quer durch das Wald-Sumpfgebiat badlet, wos übrigens Waschbära kha het... Jo das isch verdammi strenga Tag xi:)
Am Samstig sind i, dr Remy, dLivia, dSabrina und dChrista wiedermol uf Bouillante go taucha. Und will i, dr Remy und dChrista scho ufm Niveau Intrim (nid intim) sind, hemmer zdritta, ohni Lehrer chöna go taucha, das isch echt spitze xi:) Will das mol hemmer endlich an Trigger Fish xeh. De Fisch isch wiana Pitbull. Er beschützt sis Gebiat, und wenn so einem begegnisch, und du sini Zeicha nid chasch düta, zerfleischt er di wiana Pitbull. Isch ziemli geils Gfühl xi:) haha, aber do miar dia Zeicha hend chöna düta, hemmer üs au schnell usm Staub macha chöna. Am Obig simmer denn an da Strand vu Grand Anse, au sona Paradiesstrand, und hend im Sunnauntergang so lustigi spieli gmacht, so errota vo Person anhand vu Mimik :D oke, dr Alk het zganza no kli lustiger gmacht xD
Ja und hüt simmer an dr Caravelle xi dr ganzi Tag, will mr leider keis Auto kriagt hend für hüt. eigentlich hemmer vor kha, dass miar hüt durch da Tropawald wanderend und denn no vilicht bi klarer Sicht uf da Vulkan ufa gönd, wili jo immer nonid döt oba xi bin... Ja aber am Strand isches au ganz lustig xi, wili hüt im Meer sona riesa Blutegel gfunda han, oder wases au isch xi. Het usxeh wiana Regawurm, isch jedoch grösser xi, und het sich bewegt wiana Schlanga, und het as Muul kha.. komisches ding das... übrigens, wunderend eu nid, dass weni hai chuma, i immer statt blöds ding, oder dumms ding, oder behinderets ding, eifach nur no monkey ding sega... het sich so ibürgeret...
Ajo und übrigens hoffi dass iar alli gschnallt hend, dasi bereits sitera Wucha rauchfrei leba, will zPäckli Zigaretta do mitterwiela fast 10 Franka chostet und dasi am 23 Mai, also no am glicha Tag wiani hai chuma, no as Tattoo gohn go stecha lo... Für ali wos wend wüssa, as git as Herzli mitemna Schriftzug " I LOVE MUMMY " uf da Oberarm... Nai Seich, das verrot i jetzt nonid wases git, as gits denn eifach...
in diesem sinne,
gohni jetzt go tuscha und denn ab in usgang... pease out & yes I :)
eura Mill
Mo
27
Apr
2009
Bin endlich ir Karibik acho!
Les Saintes - Sunset
Chère suisse,
as isch natürlich wieder mega viel passiart sidi mi zletsta Mol gmolda han, aber halt würklich verzellendswert sind halt schu praktisch nur dWuchaend. Will dr Usgang wo unter dr Wucha no intressant weri, do wetti eba kai Detail drvo verzella:)
Also eba zu dem Wuchaend. I, dr Raymond, dMartina und dr Michel sind uf dLes Saintes. Über a Kollegin us dr Schwiiz vum Raymond, wo aber schu zimli lang uf da Saintes innara Bar schafft, simmer zunnara ganz günstiga Unterkunft für ei Nacht cho. Noch einahalb Stund Bootsfahrt (für 13 Kilometer, wills sona krasse Wellagang het), hemmer au grad üses "Huus" bezoga. Über dNicole, dKollegin vum Raymond, und ihrem Vitamin A, B und C, hemmer für 15 Euro pro Nasa, an oberi Stock vomana riiiiiiesa Huus chöna miata. De oberi Stock het 9 Schlofzimmer, 4 Badzimmer, an riiiiesa Ufenthaltsruum mit Kuchi und emna riesa Balkon um zHuus kha. No öpis interessants grad no vorhinweg: uf da Saintes isches verbota zum Schiessipapier zWC abalo, also immer schön dr Arsch putza und denn ab in Kericht mitem Papier, schmöckt amigs fein uf da WCs... DNicole het üs denn no super Roller organisiart, mit dena miar denn dInsla erkundet het, uf dera Insla het übrigens fast kai Autos kha, eifach hammer! Bi dr Nicole dahai, a wiiisi Wohnig, wo nur zSchlofzimmer im Prinzip um viar Wänd uma isch, dr Rest isch alles frei, hemmer üs mit a paar feina Spaghetti chöna sterka. Nocher simmer denn no go shoppa, wills echt super döt isch zum shoppa:)
Am Obig simmer inas sau tüürs Resti, wo zwar mega fein xi isch, aber so 20 Euro für as bizli Fisch, isch schu biz bonznig... Und nocher isches los ganga: nonid mol verdaut, simmer in sona Bar ganga, Tropical Coco Bar chez Céline, was aber guat übersetzt heisst "Kampftrinken für Céline". Ja was sus no alles an dem Obig gloffa isch, chani jetzt do wieder nid wieter verzella...
Am nögsta Tag simmer schnell am 9 ufgstanda, hend schnell dRoller zrugg geh, zMorga gessa und nomol ab ins Bett. Am 1 oder so, simmer denn nomol kurz an Strand und denn halt wieder zrugg uf Guadeloupe...
I muass echt sega, für jeda wo mol uf Guadeloupe goht, gohn mol uf dSaintes, will er döt dKaribik afoht. Guadeloupe isch wunderschön, aber as isch eifach fast nia so richtigs Karbikfeeling. aber uf da Saintes isches a so schön, aso familiär und eifach Karibik!
A bientôt...
So
19
Apr
2009
jolies dauphins
dauphins de petit-terre
Chère suisse,
gestr simmer zölfta nach Petit-Terre gfahra. A Insla, wo vo Menscha unbewohnt isch, jedoch lebend über 9000 Leguane dött druf. Aber nid nur wega dena isch dia Insla was ganz bsunders, sondern wills au as Naturreservat isch, und ma um dInsla uma nid döff fischa, git unglaublich viel Tiar um dia Insla uma. Miar sind mit dr Black Pearl döt hera gfahra, resp gfloga:) denn simmer zerst mol go schnorchla. Döt hemmer Schildkrötana, Rocha, Baracudas und unzähligi Fisch xeh. I und dr Dom hend a Haiflossa xeh kha, darum simmer denn de Hai au go suacha, hend na aber leider nid gfunda. Nochemna wunderbara essa simmer nomol biz usagfahra und hend dDelfin gsuacht, und schlussendlich au gfunda. Mitera, in dr Tauchermaska integriarta Camera, hemmer denn mega schöni Picts und Filmli chöna macha.
No schöns Wuchaend..
Fr
17
Apr
2009
Vieles passiart!
Salut Schwiiz,
so jetzt hanis endlich gschafft zum neui Fötali ufalada, und an neua Blog schrieba. Also i bin eu no dia ganza Storys vum Wuchaend schuldig. Miar hend jo verlängerets Weekend kha, also gits no an actionriecha tag zuasätzlich zum verzella!
Also, dChrista (eini vu Bern), dMartina (eini vu Züri), dPhilippa (eini vu Lincoln GB), dAnnette (eini vu Floken NW) und i hend üs für dia drei Täg as Auto gmiatet, an Citröen C3, super Auto:) Am Samstig simmer zerst uf da Mittag na Bouliante go taucha. Döt hani zersta Mol döffa selber, also allai taucha, isch as unbeschrieblichs Gfühl xi! I seg eu, das isch wia flüga! Dasmol hani aber leider nid zGlück kha zum Schildkröta xeh:( Nochem Taucha hani dena neua Fraua noch dPlage de la perle zeigt, dia kennend iar jo langsam, han schu jenstes Mol drvo verzellt, wills einfach dr schönsti Strand do isch, zum Sunnauntergäng luaga. Do aber dPhilippa abgmacht het zum dahai essa, hemmer leider schu vorem Sunnauntergang hai müassa... Am Obig simmer denn no sexyhexy ins Karibik ganga, üsera Stamm (disco ?) (beiz ?) (bar ?).
Am Sunntig simmer mitem Auto richtig Morne à l'eau gfahra, zum Krabbafest. In der Schwiiz isches jo normal, das dKinder dEili gönd go suacha. Do in Gwada gönd dKinder go Krabba suacha, klingt zwar komisch, is aber so.. Und am Endi vum Tag gits as Krabawettrenna. Aber jo, dia schnellsti Krabba het jo eigentlich nid gwunna, dia wird jo am Schluss au gessa... Wia au immer, dKrabba sind echt fein xi. Als nöchsts hemmer mim Auto zum Point de la grande visie wella. ZProblem isch nur das dr Mill as Leck im Auto entdeckt het, und sich gfrogt het, wieso do jetzt a Flüssigkeit usalauft. ZProblem isch eba xi, dass dia liabi Christa gfahra isch, und sie vollepulle uf da Wassergraba gfahra isch, und der Unterboda vum Auto halt ufgsessa isch. Miar sind denn vorsichtig wietergfahra und hend zAuto binnara Tankstell durachegga lo. Er het gmeint, das dr "Abfluss" vom Küahlerwasser as Leck heigi, aber das isch jo nid schlimm, also simmer wietergfahra. Am nördlichsta Punkt vu Gwada, also eba de Punkt vo dr grossa Ussicht "point de la grande visie", hemmer denn as PickNick gmacht, mitemna 1.50 Euro Wii, Chipps und Chuacha:) Am Schluss simmer noch nach Petit Canale go an Sunnauntergang ankükseln. Zbesta an dem Tag isch aber dReggae und Dancehall Party am Obig im Karibik xi. Livemusig, Ti-Punch, lustigi Lüüt und viel Durst hend de Obig unvergesslich gmacht, isch halt au bis am halb 6i ganga...
Am Mäntig morga simmer denn mitem Auto dr Südküsta vu Basse-Terre entlang gfahra und hend in erster Linia mol ghoffa, dases bald ufhört pissa, will as het echt unglaublich fest gregnet! Wommer denn mittlerwiela in dr Traversa a cho sind (das isch dia einzigi Stros wo quer durch da Nationalpark goht), hets ufghört regna, und miar sind grad bim Zoo xi. Also, hemmer alli nonid kennt, also ab die Post in den Zoo. Mann isch das lustig xi. Waschbära, Leguan, Fischotter, Affa, Vögel, Fledermüüs, uuuund so wieter. Alles imana Zoo, zmidst im tropischa Wald vu Guadeloupe! Isch zwar zimli tüür xi, drfür hets am Schluss no an riesa Seilpark geh, wo über da ganz Zoo ganga isch, uuuu huara hoch isches xi! Zu guter letzt simmer, wills schu öpa halb 7i xi isch, in Point Noire an Sunnauntergang go aluaga.
Also das isch jetzt mol mis letzta Weekend xi, und znöchsta stoht jo schuwieder vor dr Huustüra. Also, am Samstig gömmer mit da Delfin go taucha, in Petit Terre, a unbewohni Insla, wo amer über 9000 Leguan druf lebend. Und am Sunntig gömmer mitem Schiff uf Marie Galante, die grössti Insla in Guadeloupe, abxeh vu da zwei Hauptinslana Grand Terre und Basse Terre.
Mis Problem mitem Reisebüro het sich übrigens mittlerwiela au klärt. I muass jetzt zuasätzlich no 200 Euro zahla, und dia restlicha 1000 Euro teilend dSchual und zBüro. Jo thats it, abxeh drvo, dass i und dr Dom hüt a neuii Sandskulptur gmacht hend resp. zwei. A Schatztrua und an Hai wo verbi schwimmt. As isch so genial cho, aber dFötali chömend bald... A bientôt..
Mo
30
Mär
2009
Ds schönsta Weekend ever...
La plage de la perle
Hallo Schwiiz, alles klar? Also, i chan eu sega, das isch mis schönsta Weekend ever xi! Am Samstig morga hemmer üs as Autogmiatet, nd denn simmer nach Basse-Terre gfahra, zum taucha. Aber will miar so früah dr xi sind, simmer no ins "Maison de Cacao" ganga. Döt hends üs erklärt wia us dera Frucht d70% Lindt wird:) Nai saich, eifach wia Schoggi hergstellt nd exportiart wird, isch mega interessant xi! Nocher simmer eba go taucha, nd wooow, isch unglaublich schön xi! Unter Wasser het ma eifach as Gfühl wia flüga... I han au als einziga, natürlich zema mit minem Tauchlehrer, Schildkröta xeh, a ganzi Familia! Ou Gott isch das traumhaft xi!
Zböda isch xi, dass miar am 6i abgmacht hend, am Obig, zum zAuto zrugg ge, nd miar sind leider erst am 2 ab 6i döta xi. Will dia leider nid so Toursita fründlich xi isch, isch si halt schu weg xi, nd miar hend zAuto mit Hai gno. Do miar also zAuto nomol für an Tag kha hend, simmer am Sunntig dr ganz Tag an da "plage de perle". De isch bekannt für dia schönsta Sunnauntergäng, also hemmer bis am Obig gwartet, nd as isch unbeschrieblich xi, aber i xehn jo das abizli uf da Picts wia schön dases xi isch!! Vum Taucha hani leider nu 3 Fötali gmacht, nd dia sind uf dr Cam vu dr Kollegin, abr dia ladi denn schu mol no ufa.
Also Lüüt iar xehnd, das isch echt zParadies do...
Fr
27
Mär
2009
"Happy Birthday" sag ich da nua...
Haaallo Schwiiz... Pua miar isch so schlecht... Mini "ganzguaaaati" Kollegin vu Dütschland isch gestr 20i worda nd miar hend mega gfiirt. Gestr Obig het üs ihri Gastmuatter zum Geburtstagsessa iglada, nd i bin no jetzt eifach voll, i glaub i muass jetzt a Wucha nüt me essa. Nocher simmer in üsi Stammbar no go Party macha. DVerena, eba si, wohnt eigentlich mega wiit weg vur Stadt, nd darum muass si immer mim Auto fahra. Aber do mini Gastmuatter so super liab isch, het si dia Nacht döffa bi miar schlofa, a win-win situation also xD
Mora gohni übrigens definitiv go taucha. Nd will ztuacha do zimli günstig isch, machi evt. wenns miar gfallt grad no z'internationala Preuvait (kai Ahnig wiama das schriebt..). Abr mini finnischi Mitschüalerin het xait as sig unglaublich schön do zum taucha... We will see... Für mora hemmr üs uf all Fäll schu mol as schön BMW Cabrio gmiatet, damit miar zur Tauchstell chömend:)
Jaja, hüt isch wiedr Fritig, nd zblöda dra isch immer, dass denn wiedr a paar Hai go müand. Aber i han jo zum Glück no a paar Fritig vor miar:)
dFinanzchefin vur Schual isch gestr no zu miar cho, nd het behauptet i heig nu für 2 Mönet zahlt. Jetzt muassi mim Reisebüro das ganza aluaga, irgendwo isch an Fehler passiart. Abr i han hüt uf all Fäll mol mini E-Banking Bestätigung dr Schual zeigt, nd jetzt bin i mol usm Schneider...
Also Schwiiz, i muass wiedr, si sind scho wiedr am Stressa dia huara Hüahner... A bientôt...
Mo
23
Mär
2009
La Désirade, le bateau et la jolie vue...
Wia bereits atöönt simmer am Fritig dNochbersinsla go abchecka, nd as isch echt wianas chlises Paradisli xi!! ZProblem isch nur dFahrt döt hera xi mim Schiff. Alli wo schumol am Atlanktik xi sind, chönd sich das jo vorstella. ZSchiff isch ufa und aba gang, aber anders derb!! I han zum Glück im Vorhinein no as Motilium gschluckt, will woni dia andera Lüüt kotza xeh han, bini echt froh drübr xi:) Miar sind döt uf sona Berg gloffa, nd dia Ussicht döt isch eifach uuuunglaublich xi!! I han viel Picts gmacht, aber i muass dia zerst no kliiner macha, sus sinds zgross.. Aber si sind so schön cho!!
Mittlerwiila hemmer viel meh Schüahler ir Schual. Aber zgeila isch eifach as het eifach nur jungi sexy Ladys nd alti Männer! Eifach klasse... Nd wenn no zInternet dahai bald mol wür tua, chans langsam nüm besser si!
Das Wuchaend gohni übrigens wohrschinlich zersta Mol go taucha! Will zSurfa isch eifach a Rundi zTüür. Also, i gohn wiedr.. Eigentlich möchti jo gera no mit minnara mam telefoniara, aber si khörts wiedermol nid...
a bientôt...
Do
19
Mär
2009
Finnisch für Anfänger...
Das Wuchaend isch zBrittchen, üses Partyluder vu Dütschland hai ganga, nd as isch recht langwilig worda... aber jeeeeeeetzt isch a noii kho vu Finnland, nd dia goht soooo ab imfall! Gestr simmer zersta mol mit dera im Usgang xi, nd dia het üs Gschichta verzellt, dia chani do gar nid verzella dia sind so unter dr Gürtellinia... Wia au immer, vilicht lerni jo jetzt no biz finnisch. zlustiga dra isch eifach, dass si as halbs Johr zZürich gschafft het, si isch Saunameisterin xi xD aber si hend si nur igstellt wills gmeint hend, si müassi jo voll dr Profi si, nd sich mega uskenna mit finnischa Saunas, aber si het nonia xeh, wia das ir Schwiiz praktiziart wird...
Wia au immer, as isch jetzt wiedr a biz Stimm ir Buuda...
Übrigens, gestr hani usagfunda dasi Wifi empfang hetti à la maison, chönti also toujours ins Internet...
A demain..
Mi
18
Mär
2009
tu veux de l'herbe??
also wenn øper gras kaufa will, denn isch do im paradis. dPolizei seit überhaupt nüt... aber eba, i blieba suuber, kai angst mam:D sorry dasi keis oe chan schrieba, aber bin grad am notebook vu minem norwegisch schatzi, nd døt gits halt statt oe nur ø... also, gestr isch halt nüt spannends passiart, will mr wiedr an spiele obig gmacht hend, nd am strand xi sind am tag. zeinziga was vilicht no interessant isch, dass ma do in da normala læda kai milch nd kai eier kha kaufa... miar hend eba gestr obig no wella crèpe macha, aber ohni eier isches abiz schwierig...
mis franzøsisch wird übrigens immer besser, bin mega stolz uf mi:) min wortschatz isch eifach no mega chli, aber das wird schu no besser... also a demain, bevori no wieterhin so sinnlosi sacha schrieba, und niamert me chunt cho luaga will nur so langwiligs züg stoht. aber am FR gømmer nach la désirade, nd denn gits denn sicher wiedr was interessant zverzella, aber zProblem isch halt, dass di interessanta und lustiga sacha woni do erleba, eifach nid so allna do chan verzella, aber jo i denka iar chønds eu vorstella. a bientôt...
Di
17
Mär
2009
Was heisst eigentlich "gemscha" uf französisch?
Gestr hemmer mol eeendlich was anders gmacht als immer nur suufa am Strand odr im Americano. Miar hend an lässiga Spieleabend gmacht:) Zerst hani mol minem dütscha Schatzali müassa erklära mit was für Karta dass miar überhaupt spielend, nd denn da anderna Schwizzerinna wia Gemscha überhaupt goht. Aber as isch echt sau lustig xi! aber do dr liabi Mill vergessa het une bouteille du vin zkaufa, hemmer halt dr ganz Obig nur Orangesaft trunka.
Ajo, bevor is vergessa: do mini Mitbewohnerin üüüüüberhaupt nid khan kocha, nd üsi Gastmuatter im Moment zParis isch, hani schu total guat kocha glernt, haha, dass ich dass noch erleben daaarf...
Übernögst Wuchaend gohni übrigens so a tolli Sach go macha im National Park. Ma goht ganz uf da Berg ufa, nd goht nocher im Fluss entlang aba, im Wasser... as heisst canoying odr so, weiss nid wiama das schriebt uf englisch. Also liabi Lüt, i gohn jetzt an Strand go sünnala, a demain...
Mo
16
Mär
2009
Le coer de brutus
also, le coer de brutus, zHerz vom Brutus, isch zTheater wonni am Fritig mitgspielt han, nd han döt dia zweiti Hauptrolla kha xD isch totaaaal lustig xi; Fötali tuani denn schu no ufalada, aber momentan isch wiedr meeega blöd mim Internet.... Gestr simmer no mitemna geila gmiateta 3er Jugo BMW dr Ostküsta entlang gfahra, bis ganz in Norda ufa, nd denn hets sona unglaublich schöna ussichtspunkt, han nonia as was sooo schöns xe!! au do chömend denn no Picts... also, i muass schu wiedr go, eifach zwenig ziit sorry, aber i hoffa iar verstönd das... Hüt chömend übrigens no 5 noii Schüalerinna, nd zum Glück isch nu eini vu denna Schwiizerin, dia gömmer nämlich langsam uf da Sack... aber das isch au nomol a anderi Story...
Do
12
Mär
2009
Chilla am Club Méd
Gestr Obig hemmer zgeilsta gfunda, was ma do macha chan! An da Club Méd go nd eis zwei Fläschli du Vin drinka :) As git echt nüt schöners woma chan macha, Fötali chömend denn no. Nd zguata an dem Club Méd Strand isch, dass ma unter dr Wucha an ca. 2 km langa Strand für sich allai het, nd vorallem dasser vu Polizista mit Hünd bewacht wird, damit nid drganz Ziit vu Bättler aphöblet wirsch, das nerfet nämlich anders!!
Am SO miatemer übrigens as Auto und gönd üsa Teil vur Insla go erkunda... Eigentlich hemmer jo sona 3 tägiga Usflug mitemna Katamaran wella macha, aber de isch wortwörtlich ins Wasser keit:D Also Schneemänner - und fraua, i gohn jetzt no biz go sünnala nd go Volleyball spiela mir Klass... A demain...
Mi
11
Mär
2009
Shopping in Point-à-Pître
Guata Tag liabi Schneemänner und Schneefraua, odr Schneelüüt, gits das?? Egal, do hets uf jeda Fall kai Schnee, nd dass isch au guat so:D also, gestr simmer nach Point-à-Pître ganga, zum go shoppa, wills angäblich döt uuu huara viel läda git, aber miar hends nid so gfunda.... Egaaaal... Dia noii Gastmuatter isch übrigens dr burner, wieso isch jo egal... Hüt gömmer wiedrmol an Strand, go sünnala.
Ajo, dGastmuatter isch bald für as wiili zFrankriich gschäftlich, denn hemmer glaub über a Wucha sturmfrei xD
Mo
09
Mär
2009
Le premier excursion...
Also am Fritig hemmer üsa Usflug gmacht, nd er isch echt unvorstellbar schön xi! Vorallem dr botanisch Garta isch eifach geil xi!! jo guat dDistilerie isch jetzt nid so dr hammer xi, abxeh drvo dass hesch chöna suufa soviel wia witsch. Hüt Obig am 6i chani übrigens zügla:) Huara geil, wobi, zEssa werdi sicher vermissa. Gestr hets Krabbe ge:D dSchwöster vur Gastmuatter het miar xtra a Instruktion ge, wiani dia Krabba muass essa, nd si isch echt endloos lecker xi, viiiielbesser als Fisch.
Gestr Obig hemmer no sonas scheiss Erlebnis kha. Miar sind alli am Obig an da Strand ganga, nd denn het üs dr Bettler wommer vum Stammlokal kennend blöd agfiggt. Miar segend ihm übrigens "mon frère". Jo er het üs alli wella verbrenna:D in dem er üsi Ruhmfläscha klaut het, nd xait er zündet dia jetzt a!! Janu, schlussendlich heter üs no mitemna grossa Stei wella Angst macha, abr miar hend ihm glich kai Geld ge... isch halt leider doch an arma huara hund.. apropos hund, i han jetzt au an Hund, dia vur Stadt segend er heissi Sandrine xD ja, si isch min treu begleiter und beschützt mi immer do in dena dunkla gassa. kai ahnig wieso er nur immer mit miar mitkund... ajo, dia ufm Fötali isch übrigens dAnnetta Oem vu Norwega, une grande canon!!
Also, hoffa dass iar alli dia schöna Fötali gönd go aluaga!!
Fr
06
Mär
2009
Moi et le ruhm xD
as isch chum zum glauba, au dia nacht bini nid viel frueaner ins bett cho... Jaaanu, lustig isch xi, aber as wer glich pas mal xi, wenn i huet fuer da usflug nach grand terre biz fitter xi wer. nd vorallem goemmer doet go ruhm degustiara, das kann ja heiter werden... As choemend uebrigens bald wieteri picts drzua, abr i chan im moment min laptop wiedr nid lada, will i kai adapter me han...
Do
05
Mär
2009
Juhuu chan umzügla...
juhu, hüt hani endlich au mol guati Nochrichta was zWohna agoht. i chan am Mäntig zügla. denn ziahni mit dr kollegin vur Schwiiz, also mir Martina zema, nd dia bliebt au no 2 mönet, nd zgeilsta isch, miar wohnend direkt neb dr Schual, öpa 1 min vum Strand entfernt, dass rockt weisch wia..! also, i gohn jetzt go jouer au beach volley avec la classe.
Dr Streik isch denn übrigens sit hüt offiziell fertig. Aber as goht jetzt ca. 90 Täg bis dLüüt mol Geld xehnd. aber dBüs fahrend wieder, darum chömer au de 60 Euro tüür Usflug mora macha. Miar gönd uf Basse-Terre, dia anderi Hälfti vur Insla, nd gönd döt jeeenes geils Züg cho macha. Ruhm degustiara, Regawald nd Wasserfäll aluaga nd sus no jeeenes Züg. Also, à demain...
Mi
04
Mär
2009
Le ruhm et moi...
Also, hüt isch eigentlich wiedr an standart xi, abxeh drvo dass mr zersta mol so richtig dr gaaanz nomitag an strand sind go chilla... abr am Obig simmer abiz zkräftig in dMöst, nd miar sind bis am halb 3i in irgend sonera Bar xi... janu, 4 Stund schlofa muass langa. Nd hüt hanis endlich gschafft zum as paar Fötali uflada, enjoy it...
Di
03
Mär
2009
Le ruhm et moi:)
Au de Tag het wiedr mit Kafi nd Fruchsaft agfanga, nd au hüt hani nonid dMöglichkeit min scheiss Akku vum Laptop zlada, aber egal. Ir Schual hemmer mol dZiita in Agriff kha, nd i han kai Plan me ka wia de Scheiss goht. Noch dr Schual simmer alli zema go Botcha spiela, ganz ir nöchi vum Strand. Döt hemmer denn biz Apéro kha, so Ruhm de Marie Galante nd so.. Nochem Botcha spiela bini mitr Martina, au a Schwiizerin, noch biz durch Saint Anne gloffa, nd denn hani miar no a geili Telefonkarta kauft, woni für 15 Euro 3 Std chan telefoniara, abr leider nur vu dahai, odr Telefonkabina. Ca. am 5i bini denn hai ganga, nd as het Poulet Colombo, resp Poulet Schenkel zNacht ge. Au das isch wiedr genial xi!! Am Obig bini wieder ins Americano, das geniala Strandpub mit da anderna... Ja noch zwei grossa Gläser Ruhm, nd amana Cuba Libre bini denn ca. um Mitternacht hai "gloffa"...
So
01
Mär
2009
C'est tout où quoi??
Hüt isch dr Tag endlich cho, woni nach Guadeloupe chan go. Zema mit drei anderna Östricher woni am Vorobig no kennaglernt han, bini an Flughafa ganga. Nochem endlosa astoh an dr Passkontrolla simmer in dia Boeing 777-300 igstiega. Dr Flug isch echt schön xi! Noch High School Musical 3, W., und amana guata Buach, bini au schu döt xi, ca. 8 Std spöter. In Guadeloupe acho, isch miar in Sinn cho, dass mi jo öper sött abhola, aber weiss dia Person das?? Egal, zerst mol a Ziggi... Bim zrugg laufa, isch miar denn eina ufgfalla, mitemna Schild mit vielna Näma druf, unter anderna Micro. Logisch, dass muass jo fast i si. Und so isches au xi. An Agstellta vur Schual het üs 5 Schüahler abgholt. Noch dem miar no 2 Stund uf dia letsta gwartet hend, isch "die Stunde der Wahrheit" do xi. Miar sind zu da Unterkünft ganga. Dia ersta Idrück vu Guadeloupe sind echt krass xi, heiss, heiss nd no heisser nd uf dr Autobahn het as Auto neba üsm an Hund total überfetzt, dr Kopf isch nu no so umagspickt:D Und denn bini schlussendlich ir dupre zone d'accueil acho. Han zerst gmeint as sig an blöda Scherz, aber nai dass isch mini Unterkunft. Oh mein Gott, oh mon dieu!!! As Beton Quadrat mit Holztüra. Aber woni no mit offnigem Muul am stuuna xi bin, het miar a meeega liabi Person zuaglacht, dAnicette, mini Gastmuatter. Si isch 63i, nd sona klischeee mässigi schwarzi-alti-guatgnääährti Frau nd meeeeega liab!! Si het a Tochter (21) wo no dihei wohnt, nd zwei Söhn wo bereits verhürotet sind, Chind het, nd nüma dahai wohndend. DAnticette het miar ihres "Huus" zeigt, nd as isch echt schlimm. Min Koffer hani nur quer dur da Gang i mis Zimmer brocht. As git kai warms Wasser. Zum Teil hets kai Strom. As het kai Klobrilla. Aber zEssa isch mega fein, kreolischi Chuchi. Kreolisch isch übrigens au dSproch wo dMenscha do hauptsächlich redend. As dönt wia afrikanisch mitemna Touch französisch. I macha aber miar immer Gedanka, wia das Essa ama zuabereitet wird, aber i wets eigentli gar nid wüssa... Todmüad bini denn aber bald igschlofa.
Fötali vum Huus kömend bald...
Sa
28
Feb
2009
Bye bye ....
As isch Samstig und nochem dritta Mol umbuacha schients jetzt endlich zklappa. Und jo, as het klappt! Nochera biizli emotionala Verabschiedig vur Mam, dr Lissy und dr Marina, anera Verspötig vunnara halb Stund und amana turbulenta Flug, bini endlich in Paris ako. Noch langem warta, suacha, warta nd nomol suacha hani denn endlich dr Shuttle Bus fürs Hotel gfunda. Aber khum hani wella istiega, klaut miar doch sona huara Wxxxr mina Rucksack sammt da neua Lacoste Schuah, am Laptop nd vielna anderna wertvolla Sacha. Jonu hani denkt, "c'est la vie", nd bin in da Bus igstiega. Ganz niedergschlaga hani mi denn uf mis Hotel Bett glega, nd schu hets Telefon glütet. DPolizei heig min Rucksack gfunda, i chöni na bim Flughafa chu abhola. Huuuuch!! Zum Glück hani am Flughafa no mis Hotel ageh müassa, sus heti min Rucksack niameh xeh.... Überglücklich mitem Rucksack ufm Bett, hani miar denn no a Pizza bstellt nd bin nocher total erledigt igschlofa...
Di
17
Feb
2009
Streiks in Guadeloupe!!
Isch jo wieder logisch... Vu Guadeloupe khört ma jo echt NIAA öpis im TV odr in da Zitiga, usser vilicht im Herbst wenn wiedermol an Hurricane gwüatet het. Aber genau denn, wenn i mol dMöglichkeit han döt hera zgo muass was passiara:
Pointe-à-Pitre (AFP) — Der seit vier Wochen andauernde Generalstreik auf der französischen Karibikinsel Guadeloupe ist in Gewalt umgeschlagen. In der Nacht zum Dienstag plünderten Krawallmacher in der Hauptstadt der Antilleninsel mehrere Geschäfte, warfen Schaufenster ein, zündeten Autos an und setzten zwei Läden in Brand. Die Polizei in Pointe-à-Pitre ging mit Tränengas gegen die Randalierer vor. Weil das Personal nicht mehr zur Arbeit erschien wurde der Betrieb des Hauptstadtflughafens eingestellt.
Die Dachorganisation LKP, die den Generalstreik in dem französischen Überseegebiet anführt, hatte am Montagabend zu stärkeren Protesten aufgerufen. Die Demonstranten sollten ihren Druck verstärken, bis ihre Forderungen erfüllt seien, erklärte das "Kollektiv gegen die Ausbeutung" (LKP), das gegen die hohen Lebenshaltungskosten auf der Insel protestiert. Derweil bildete sich eine Gegenbewegung, die den in die fünfte Woche gehenden Generalstreik ablehnt. Die Gegner der Streikenden wollten am Dienstag einen Schweigemarsch abhalten.
Staatschef Nicolas Sarkozy kündigte derweil an, dass er die führenden Vertreter der französischen Überseegebiete am Donnerstagabend in Paris empfangen werde, um den "Stand der Dinge" zu klären. Der Präsident hatte Ende vergangener Woche angekündigt, er werde einen ministerienübergreifenden Rat einsetzen, der sich mit der Überseepolitik befassen soll.
In Guadeloupe und seit knapp zwei Wochen auch auf der Nachbarinsel Martinique steht das öffentliche Leben praktisch still. Schulen, Ämter, Banken und Geschäfte in den beiden französischen Verwaltungsgebieten sind größtenteils geschlossen, die Müllabfuhr hat ihre Arbeit eingestellt, an den Tankstellen gibt es kaum noch Benzin. Der Hotelverband bezeichnet den Verlust für die Reisebranche als "katastrophal" - die Karibikinseln sind gerade während der derzeitigen Winterferien ein beliebtes Urlaubsziel bei den Franzosen.
Quella: AFP
Uf de Schock aba, hani natürlich sofort minem Reiseverastalter aglütet, aber dia hend gar nonüt khört vu dem, denn hends sofort uf Guadeloupe aglütet, in mini Schual. Döt hends das ganza zum Glück nid so tragisch xeh... Abr i han jetzt eifach kli schiss, dass dr Flughafa an minem Areisetag au gschlossa isch...
Do
12
Feb
2009
2-wüchigi Abschiedsparty:)
Hüt beginnt dia 2-wüchigi Abschiedsparty:) haha, also hüt obig gohni no mir Marina und dr Melanie ans Pussycat Dolls Konzert mit special guest Lady Gaga!
Am SA gohts denn wieter mit Fasnacht Malix, und nögsts Wuchaend mit Luzerner, Selzacher und Grenchner Fasnacht:) und dr krönendi Abschluss vu dera Partytime isch dr Final Evening mit da BadBoys, hoffentlich komplett... Will an Tag bevori gohn, kunt dr Nölla vum halba Johr down under zrugg! und denn gohts wiedrmol komplett ab in dMöst!!
Ja as git übrigens au News vum Militär! Unglaublichi 3 Mönet noch minem ireicha vum Franktioniarigsgsuach hani zwar immerno kai Antwort kriagt, han abr drfür kurz noch dr administrativa Entlassig vur OS schu wiedr zUfgebot kriagt für mini nögsti Dianstziit, isch jo unglaublich. Und dr Hammer an dera Sach isch no, dasi jo eigentlich vur OS Entloh worda bin, abr jetzt vum Militär as Ufgebot für dia nögsti OS kriagt han xD sona spasti Verein chani nur sega...
Jo also, muass mi langsam ready macha für zKonzert:)
Mi
04
Feb
2009
Vorbereitiga
so liabi lüüt, as goht nüm würklich lang, nd denn bini away. as goht no 24 Täg um genau zsi. und mittlerwila bini jo zum glück nüm im militär, aber zFraktioniarigsgsuach hängt eigentlich immer no in dr Luft. Drfür hani ir zwüschaziit dr Briaf an mini Gastmuatter gschrieba:) und kurzi Hosa hani mittlerwiela au:) ja jetzt muassi aber no unbedingt mini Stüra no ireicha, min Füahreruswiis übersetzta lo, nd bir krankakassa luaga ob im Usland alles deckt isch. abr sus bini glaub bald ready for take off.
So fertig gschrieba, muass no bizali go schaffa:)
Mo
29
Dez
2009
No vieles ztua...
Hoi liabi Lüüt,
also, as goht jetzt no genau 2 Mönet bisi döt bin, nd i bin scho total nervös. Min Flug hani nonid buacht, und zschlimmsta, i han mini Fraktioniarig für zMilitär nonid bestätigt kriagt. janu, muass no biz Gas ge...
Hm aber isch schu biz komisch, so eifach dKollega zrugg lo für dia langi Ziit. Aber wenni dr Schnee dussa aluga, nd uf Termometer xehn dasses -9.3 °C isch, froii mi denn doch total uf Guadeloupe:) ja i han sogar no noii Badhosa kauft. I han denkt, wenn an Zürcher mitera super Snowboardusrüstig usxeht, als werer voll dr Pro, denn klappt das mit da Badhosa und am surfa sicher au, odr nid?? xD
Druckversion
Diese Seite weiterempfehlen